លោកស្រី វិន ស៊ីធួន បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលសម្តេចដែលតែងតែគិតគូរ ពីសុខទុក្ខបងប្អូនប្រជាពលរដ្ឋ ជាពិសេសស្ត្រី និងកុមារ។ លោកស្រី វិន ស៊ីធួន មានប្រសាសន៍ថា ថ្វីត្បិតតែឆ្នាំ២០២០ កន្លងទៅ និងរហូតមកទល់ពេលនេះ ប្រទេសកម្ពុជាបានជួបនូវវិបត្តិនៃជំងឺកូវិដ-១៩ ពិតមែន ក៏ប្រជាជនទាំងអស់ រស់នៅជាធម្មតា តាមបែបកន្លងថ្មី ម្យ៉ាងវិញទៀត ដោយមានគោលនយោបាយគាំពាំសង្គមរបស់រាជរដ្ឋាភិបាល បានជួយដល់ប្រជាជនដែលងាយរងគ្រោះឱ្យទទួលបាននូវការឧបត្ថម្ភជីវភាពរស់នៅ ក្នុងកាលៈទេសៈដែលមានការយាយីរាតត្បាតដោយជំងឺកូវិដ-១៩ ហើយគោលនយោបាយសង្គមក៏បានពង្រឹង និងបន្តជួយដល់ក្មួយៗនារីទាំងអស់ដែលមានប័ណ្ណសមធម៌ កម្មការិនី ឱ្យទទួលបាននូវអត្ថប្រយោជន៍ក្នុងការថែទាំសុខភាព ទទួលបាននូវការពិគ្រោះ ពិនិត្យ ព្យាបាលជំងឺ ទទួលរបបឧបត្ថម្ភមាតុភាព រួមចំណែកជួយឱ្យគ្រួសារនីមួយៗអាចរស់នៅជាប្រក្រតី។

 

លោកស្រី អនុប្រធានគណ:កម្មាធិការសាខា មានប្រសាសន៍បន្តថា ការងារចាំបាច់ដែលដែលយើងត្រូវរួមគ្នាធ្វើនោះ គឺធ្វើយ៉ាងណាឱ្យគ្រប់ស្ត្រីមានផ្ទៃពោះទាំងអស់ទទួលបានការពិនិត្យថែទាំ ចាប់ពីពេលពរពោះរហូតដល់ពេលសម្រាល និងបន្ទាប់ពីសម្រាលកូនហើយ ត្រូវបន្តថែទាំសុខភាពទាំសុខភាពទាំងម្តាយទាំងកូនក្នុងអំឡុងពេល១ខែកន្លះ និងបន្តថែទាំសុខភាពទារករហូតដល់កូនមានអាយុពីរឆ្នាំ។

 

ជាមួយគ្នានេះ លោកស្រី អនុប្រធានគណ:កម្មាធិការសាខា ក៏បានណែនាំដល់ប្រជាពលរដ្ឋទាំងអស់បន្តចូលរួមអនុវត្តឱ្យបានខ្ជាប់ខ្ជួននូវវិធានការការពារខ្លួនពីជំងឺកូវិដ-១៩ របស់ក្រសួងសុខាភិបាល ដោយត្រូវ៖ ពាក់ម៉ាស់ លាងដៃញឹកញាប់ និងរក្សាគម្លាតសុវត្ថិភាពបុគ្គលពីមួយម៉ែត្រកន្លះឡើង និងមិនត្រូវទៅកន្លែងដែលមានមនុស្សច្រើន  កន្លែងបិទជិត គ្មានខ្យល់ចេញចូល និងកុំប៉ះពាល់គ្នានៅពេលជួបគ្នា កុំចាប់ដៃ កុំកៀកស្មារ កុំឱបគ្នាជាដើម។

 

សូមបញ្ជាក់ថា ៖ ស្រ្តីមានផ្ទៃពោះ និងកូនតូច ក្នុង១នាក់ៗ ទទួលបាន ៖ ក្រមា១ សារុង១ មុង២ សាប៊ូ ២ដុំ ម៉ាស់៥ និងអាវយឺតចំនួន២ផងដែរ ៕